I riu që u plagos tek “Komuna e Parisit”, ka treguar për policinë se çfarë ndodhi. Ngjarja u shënua rreth orës 22:35, tek lulishtja në rrethrrotullimin e “Komunës së Parisit”.
Në deklarimin paraprak që dha pas ngjarjes, Redi ka thënë se nuk e ka parë se kush e ka plagosur, pasi kishte mbuluar kokën me duar për vetëmbrojtje. “Po shkoja në shtëpi. Parkova makinën dhe po merresha me celularin, kur dikush u afrua dhe me qëlloi. Nuk e pashë se kush ishte sepse mbulova kokën me duar. Nuk e di kush më ka qëlluar”.
Deklarimet e tij nuk kanë ndihmuar hetuesit për identifikimin e autorëve. Blutë e Tiranës po punojnë me kamerat e sigurisë, për të marrë të dhëna që do të çojnë në identifikimin e autorit. Po ashtu po pyeten rrethi shoqëror dhe familjar i Redi Ballës, për të kuptuar nëse ka pasur konflikte.
Redi Balla është mik me Kozakun, i cili pak ditë më parë u rrëmbye nga disa persona. Redi gjithashtu është shok i këngëtarit të njohur Marin.
22-vjeçari gjatë natës iu nënshtrua një ndërhyrje kirurgjikale, për shkak të plagosjes në këmbë dhe ndodhet jashtë rrezikut për jetën. Burimet bëjnë me dije se ai konsiderohet si “problematik” nga autoritetet.
