Një ngjarje e rëndë tronditi kryeqytetin mesditën e sotme, ku në afërsi të Gjykatës së Tiranës, një 52-vjeçar vrau me armë zjarri ish-bashkëshortin e vajzës së tij, si dhe plagosin avokatin me të cilin viktima po shoqërohej.
I plagosur mbeti avokati Adriatik Cama, i cili është një emër i njohur pasi më parë ka ushtruar detyrën e prokurorit. Por, kush është Adriatik Cama?
I shkarkuar nga Vettingu
Adriatik Cama nuk mundi të kalojë Vettingun, ndaj më 12 korrik të vitit 2018, Komisioni i Pavarur i Kualifikimit e shkarkoi nga detyra e prokurorit pranë Prokurorisë së Rrethit Gjyqësor Tiranë.
Arsyet e shkarkimit
Sipas KPK, prokurori Cama ishte përfshirë në korrupsion në kohën kur drejtonte Prokurorinë e Lushnjes, pasi kishte marrë një shumë parash për pushimin e një çështjeje.
bashkë me një prokuror tjetër, Cama kishte marrë para nga familjarët e një personi të proceduar për “kontrabandë” për të pushuar hetimet ndaj tij.
Ndërkohë, KPK argumentonte në vendimin e saj, se Cama nuk e justifikonte pasurinë e tij. Kontrolli i pasurisë kishte vërejtur disa probleme në pasuritë e prokurorit ku KPK vlerësoi se ka mungesë burimesh të ligjshme për një përqindje të tyre.
Hetimet dhe avokatia
Cama njihet për hetimin e dosjeve të bujshme si vrasja e bankierit Artan Santo dhe dosjes së 21 janarit. Gjithashtu, ai është avokati i Nevaldo Hajdarajt, efektivit i cili ekzekutoi të riun Klodian Rasha më 8 dhjetor të vitit 2020.
