Drejtoria vendore e arsimit parauniversitar të Korçës, ka pezulluar drejtorin Adriatik Haxhillari, i cili akuzohet nga dy nxënëset 14-vjeçare, për ngacmim seksual. Deri në përfundim të hetimeve që po kryhen ndaj tij, ai do të jetë i pezulluar.
Drejtori u arrestua të shtunën nga policia e Korçës, pasi akuzohet se prej dy javësh kishte ngacmuar seksualisht dy nxënëse të mitura të kësaj shkolle.
Ato kanë rrëfyer në prani të psikologut, se drejtori i ngacmonte gjatë orës së mësimit, si edhe me mesazhe në orët e mbrëmjes.
Vajzat e mitura nuk kanë treguar në familje në lidhje me ngacmimet, dhe as kanë denoncuar. Mesazhet e para janë parë nga vëllai i njërës prej vajzave, e cila i kishte prindërit në Greqi, dhe shqetësohej me thirrje në telefon në orën 23:00.
Më pas, i vëllai i ka shkuar te takojë drejtorin dhe e ka goditur, ndërsa të nesërmen drejtori e ka thirrur për t’i kërkuar ndjesë.
Po ashtu mësohet se Haxhillari shkonte në shkollë i dehur, pasi konsumonte alkool çdo ditë në lokalin e fshatit, para fillimit të mësimit.