Një 28-vjeçare ka dhunuar një mjeke dhe një infermiere në Poliklinikën e Fierit, ndërsa “mollë sherri” janë bërë procedurat që duhen ndjekur për kryerjen e një vizite. Mjekja Erjola Minjo dhe infermierja Erinda Shuli, kanë qenë gjatë orarit të vizitave, kur në mjediset e Poliklinikës ka hyrë 28-vjeçarja Viola Selimaj. Kjo e fundit ka kërkuar të kryej vizitën pa plotësuar dokumentacionin e nevojshëm, për nënën e saj.
Mjekja dhe infermierja kanë kërkuar nga e reja që të kryente të gjitha procedurat për ekzaminimin e së ëmës, e më pas të kthehej. Kaq ka mjaftuar për të ndezur gjakrat. Situata ka nisur të agravojë në çastin kur 28-vjeçarja ka nisur fillimisht të bërtasë e të kërkojë me ngulm kryerjen e vizitës për të ëmën. Ajo ka goditur me shkelma e grushte e më pas është larguar nga mjediset e Poliklinikës. Tashmë uniformat blu janë vënë në kërkim për kapjen e saj.
