Gjykata e Posaçme i ka komunikuar masën “arrest në burg” avokatit Lavdosh Shehu, i cili akuzohet për “ushtrim ndikimi të paligjshëm” ndaj personave që ushtrojnë funksione publike.
Shehu kishte kërkuar 12 mijë euro nga familja e Fatos Hysenit, në mënyrë që të bënte të mundur sjelljen e tij në Shqipëri, për të vuajtur dënimin në vendin tonë.
Hyseni është i dënuar në Itali, dhe ndodhet i burgosur në vendin fqinj. Që në 2020, avokati i kishte marrë familjes së Hysenit 5 mijë euro dhe të tjerat do t’i merrte kur të përfundonte puna.
SPAK nisi hetimet pas të dhënave që emisioni investigativ “Stop” në Tv Klan, dorëzoi pranë Strukturës së Posaçme, duke dokumentuar shkeljet e avokatit.
Shehu ka kërkuar një shumë prej 12.000 eurosh nga familjarët e të dënuarit Fatos Hyseni, duke premtuar dhe siguruar atyre se ka aftësinë për të ushtruar ndikim në funksionarë të Ministrisë së Drejtësisë për transferimin.
Nga shuma e kërkuar, Shehu ka marrë vetëm 5 mijë euro, ndërsa ndërhyrja tek zyrtarët e Ministrisë nuk është realizuar.
