Tetë arkivolë dolën nga Pallati i Kulturës në Durrës, për t’u përcjellë drejt banesës së fundit. Familja Lala është një ndër më të prekurat rëndë nga tërmeti i fundit, me numrin më të lartë të viktimave.
I vetmi që u nxorr gjallë nga vila e familjes Lala në zonën e ish-Kënetës, është 17-vjeçari Ramë Lala. Vila e familjes Lala u shemb nga tërmeti i fortë me magnitudë 6.4 i shkallës Rihter. Lëkundjet sizmike kishin dëmtuar themelet, dhe shtëpia ishte shembur pjesërisht, duke bllokuar anëtarët e familjes Lala.
I gjithë Durrësi ka marrë pjesë në homazhet që u zhvilluan në Pallatin e Kulturës, për të nderuar Sadete Lalën, Ilir Lalën, Griselda Lala, Marjeta Lala, Emilio Lala, Amelia Lala dhe binjakët Dionis e Dionisa Lala.
Të pranishëm kanë qenë kryeministri Edi Rama, dhe presidenti Ilir Meta.
“E pamundur të gjesh fjalë për të ngushëlluar familjen Lala, pas kësaj tragjedie të tmerrshme. Zoti u dhëntë forcë për ta përballuar këtë dhimbje të pangushëllueshme. Detyrimi ynë, për t’i qëndruar pranë atyre gjithmonë”, është shprehur Meta.
Vila qëndroi e anuar 8 orë pas tërmetit shkatërrimtar, ndërsa ekipet e emergjencave nuk arritën të futeshin brenda, për të shpëtuar të mbijetuarit deri në atë moment.
Familja Lala, me origjinë nga Kukësi dhe e vendosur prej rreth një viti në një vilë 4- katëshe në zonën e ish-Kënetës, pësoi tragjedinë më të madhe. Ilir Lala, person me aftësi të kufizuara, ishte i fundit që u nxor nga rrënojat e vilës, pas 7 të tjerëve, përfshirë edhe binjakët Dionis e Dionisa Lala, të gjithë të vdekur nën rrënoja.
