Ish-kryeministri Berisha e ka cilësuar vendimin e kryedemokratit Basha, si një thikë pas shpine për çdo demokrat, ndërsa ka deklaruar se do të përdorë mekanizmat statutorë për thirrjen e Kuvendit të Jashtëzakonshëm Kombëtar të kësaj partie. Po çfarë do të synohet me thirrjen e Kuvendit Kombëtar, në kushtet kur kreu i PD-së ka nënvizuar se nuk do të ketë asnjë mbledhje forumesh që do të analizojë vendimin e Qeverisë amerikane, apo sikundër është etiketuar një “Kuvend anti-amerikan”?!
Sipas Berishës, Kuvendi do të shërbejë për të shënuar pikën e kthesës në ringritjen e PD-së, dhe vazhdimisht nga takimet e foltores së tij iu ka bërë thirrje delegatëve që të marrin pjesë.
Që Kuvendi të mund të mblidhet, duhet firma e të paktën 1/4 të anëtarëve, dhe paralelisht me “Foltoren”, Berisha po i mbledh dhe këto firma, që sipas eksponentëve të ndryshëm do të duhet të jenë dhe të noterizuara.
Për të mësuar rreth këtij procesi të mbledhjes së firmave, dhe sa ligjore është kjo, kreu i PD-së Lulzim Basha ka thirrur në një takim Edi Palokën, kreun e këshillit kombëtar të PD-së.
Ky i fundit i pyetur nga “Fax News”, ka pranuar kafen me Bashën, por ka preferuar që të mos e konfirmojë temën e diskutimit.
“Po është e vërtetë që më ka kërkuar që të takohemi, nuk ka asnjë sekret, se kanë qenë dhe gazetarët aty. Se çfarë është biseduar, nuk e kam bërë publike, dhe nuk ia kam thënë as ndonjë gazetari privatisht”, ka thënë Paloka.
