Kryeministri Rama, nga foltorja e Kuvendit deklaroi se paketa Anti-KÇK është fytyra e qeverisë. Ai tha me ironi se i ashtëquajturi ‘president’, i qan hallin krimit.
‘Një koalicion po sulmon luftën ndaj krimit’, tha më tej Rama. Ai e ka nisur fjalën e tij me tone të larta, ndërsa deklaroi qartazi se qeveria e tij është fytyra e Anti-KÇK-së. Duke folur për nismën e qeverisë që shënon sipas tij, betejën më të fortë në 3 dekada kundër krimit të organizuar, kanë dalë ata që ai i ka quajtur horra e hipokritë me kostum, në mbrojtje të kriminelëve.
“Është e vërtetë, paketa Anti-KÇK është fytyra e qeverisë sonë, 100%. Nga ana tjetër, ju siguroj se shqiptarët nuk pyesin për syzet e diellit pa ditë me shi të asaj vajzës, por pyesin çdo ditë e më shumë për shiun e lotëve të shumëkujt që ka një zë në publik, përfshirë edhe juve. Për ata që ua kanë fshirë diellin nga sytë, viktima të krimit të organizuar. Për ata që u kanë fshirë diellin nga sytë të mijëra vajzave të trafikuara në rrugët e Evropës.
I kanë fshirë diellin nga sytë mijëra prindërve, që i shikojnë fëmijët të droguar. I kanë fshirë diellin nga sytë shumë jetimeve që kanë mbetur pa baballarë, që ja kanë vrarë këta”.
