Pasi PD i kërkoi Prokurorisë verifikimin e figurës së tij, kryebashkiaku i Vorës, Agim Kajmaku, në një prononcim telefonik për RTV Ora tha se: “Jam krejtësisht i pastër, dhe vazhdoj takimet me popullin”.
Ai pranoi se ka punuar në Greqi, por nuk ka pasur asnjë problem. ” Jam krejtësisht i pastër, dhe vazhdoj punën në krye të Bashkisë. Aktualisht jam duke vazhduar takimet me popullin”, u shpreh ai në një prononcim për RTV Ora.
Pak më herët u bë publike se Partia Demokratike ka depozituar në Prokurori një kërkesë për verifikimin e pastërtisë së figurës të kreut të njësisë vendore të Vorës, Agim Kajmaku, kandidatit të Partisë Socialiste të dalë nga zgjedhjet e 30 qershorit.
Kërkesa e firmosur nga Sekretari i Përgjithshëm i demokratëve, Gazment Bardhi, bazohet në të dhënat e bëra publike më herët, që ngrenë pretendimin se Kajmaku ka qenë i arrestuar në Greqi, dhe për rrjedhojë, ndaj tij është marrë masa e dënimit dhe e dëbimit nga autoritetet përgjegjëse greke. Në këto kushte, sipas PD-së, Kajmaku duke qenë subjekt i Ligjit të Dekriminalizimit, nuk mund të ushtrojë funksione publike.
