Alfredo Xhejms Pacino, është padyshim një ikonë e kohërave tona. Me një karrierë mbi gjysmë shekullore si aktor, ai ka frymëzuar breza të tërë me talentin dhe personalitetin e tij unik në ekran.
Por fillimi për të nuk ka qenë i lehtë. Prindërit u ndanë kur ishte vetëm 2-vjeç. Edhe pse i varfër, nuk hoqi dorë nga ëndrra për t’u bërë aktor. Kur ishte vetëm 16-vjeç, braktisi gjimnazin dhe familjen, për të jetuar si i pavarur dhe ndjekur një kurs aktrimi. Humbja e nënës kur ishte vetëm 21-vjeç, ishte një goditje e fortë për të.
Ai paragjykohej në audicione si një italo-amerikan. U refuzua nga shumë regjisorë, por nuk u dorëzua. Edhe kur nisi të ketë sukses, Al Pacino, i kthehej alkoolit për të përballuar presionin.
Kjo i shkaktoi jo pak probleme në lidhjet e tij me gratë. Një nga rolet më ikonike të tij në kinema, është ai i Michael Corleone tek “Kumbari”, për të cilin u pagua vetëm 35 mijë dollarë. Për të ishte një rol kaq i vështirë, sa që kur mbaruan xhirimet, nisi psikoterapinë për të menaxhuar shëndetin e tij mendor. Seancat me psikologun do të vazhdonin për 25 vjet të tjera.
TIRANA TODAY
