Kryeministri Edi Rama ka reaguar sërish lidhur me historinë e Manjola Cakonit dhe të birit Alesio.
Rasti në fjalë u bë publik nga PD, e cila denoncoi se familja nuk ka përfituar pension nga tërmeti edhe pse kishte humbur dy anëtarë.
Me anë të një videoje të shpërndarë në rrjetet sociale, Rama thotë se Manjolës e të birit i është dhuruar një shtëpi nga Bashkia Kamëz dhe se Alesio përfiton edhe pension.
Kreu i qeverisë theksoi se publikimin e historisë së saj e ka përjetuar me shumë keqardhje dhe akuzon opozitën se po i përdorin si “karrem”.
“Në rastin konkret e kam përjetuar me shumë keqardhje dhe me një ndjesi neverie siç ju thashë abuzimin me të ëmën e Alesios, e cila është një nënë dhe një grua e lënduar psikologjikisht, shpirtërisht nga një tragjedi që nuk kalon kurrsesi pa lënë gjurmë, ndërkohë që mendoj se etika e medias dhe për më tepër e politikës duhet ta ndalojë hedhjen e nxituar të hapave të tillë për të konsumuar në publik njësoj si një restorant, klub, apo mjedis ku hahet mish, mishngrënësen e njerëzve në nevojë, njerëzve në sëkëlldi, të traumatizuar dhe duhet t’i referohet fakteve.
Do të ishte shumë njerëzore, e lavdërueshme që pa e abuzuar, konsumuar dhunuar imazhin fizik, praninë fizike në tregun e gjësë së gjallë mediatik dhe politik të hulumtoheshin faktet nëse unë dhe qeveria i kemi braktisur, apo ju kemi qëndruar pranë, jo vetëm Manjolës dhe Alesios por të gjitha familjeve, qofshin ata që humbën njerëz, apo ata që humbën pasuri. Nëse keni fakte referojuni dokumenteve që tregojnë referimin në publik të diçkaje që kemi marrë përsipër, atëherë nuk do ishte nevoja të arrihej deri këtu.
Neveritem kur shoh se si hiena, që e ka vendin në kategorinë më të ulët të kafshëve të pyllit, shfaqet në formën e personit publik, logos mediatike, kostumit partiak dhe ha mish njeriu, duke i ftuar të gjithë në një orgji mishi dhe dehje me demek atë ndjenjën e solidaritetit dhe keqardhjes. Ky nuk është as solidaritet, as keqardhje, por shpërdorim, abuzim dhe rrënim i njerëzve”, thotë Rama.