Pas përplasjeve aq shumë të diskutuara me kryeministrin Edi Rama, kryebashkiaku i Vlorës Dritan Leli ka qenë krah Ministrit të Mbrojtjes, Niko Peleshi në Dukat, për të koordinuar punën për shuarjen e flakëve. Ai tha se organet e ligjit po punojnë për këtë, por shqetësim mbetet zjarrvënia e qëllimshme. Kryetari i Bashkisë Vlorë, Dritan Leli, kërkoi që sa më shpejt të zbardhen rastet e zjarrvënies së qëllimshme, të cilat, sipas tij, kanë shkaktuar edhe situatën e zjarreve në Vlorë, por jo vetëm.
“Emergjencat civile kanë qenë në krye. Si e dëgjuat nga ministri, zjarrëvëniet e qëllimshme kanë kryer situata të rënda. Zjarri në Bisht Poro ka qenë i qëllimshëm. Me koordinimin e punës dhe me kërkesën e ministrit Peleshi, ne jemi zhvendosur në zonën e Bisht Poro, për të bërë fikjen e zjarrit.
Janë organizuar forcat që janë në Bashki, forcat zjarrfikëse kanë qenë në zonën e Pashalimanit si tha ministri. Në këtë situatë ajo që shkakton të gjithën dhe na bën të përballemi është zjarrvëna e qëllimshme. Aty ky fillon e keqja, organet e ligjit po punojnë për këtë, por na takon të gjithëve të rrisim alarmin për këto zjarrvënie të qëllimshme”.
Shumë vende në Evropë janë përfshirë nga flakët. Komisioni Evropian po mobilizon me shpejtësi mbështetje për të ndihmuar vendet, në kufizimin e përhapjes së zjarreve. Drejt Shqipërisë do të vijnë shumë shpejt dy helikopterë, për të mbështetur operacionet për fikjen e zjarreve, një nga Çekia dhe një nga Holanda. Kjo është ndihma që na vjen nga Bashkimi Europian në kuadër të aktivizimit të Mekanizmit të Mbrojtjes Civile të Brukselit.
