Në ekzekutimin e Hekuran Billës ka marrë pjesë edhe një vajzë 26-vjeçare. Ajo është Adjola Lakra, e cila është arrestuar nga uniformat blu ditën e sotme. Pas hetimeve të kryera për këtë ngjarje, ka rezultuar se Lakra ka qenë bashkëpunëtore në vrasjen e Hekuran Billës te Komuna e Parisit. E reja është përdorur nga autorët si karrem.
Ndërsa bëhet me dije se ka qenë e dashura prej 2 vitesh e Hekuran Billës, që po shkonte ta takonte pak para se ta vrisnin.
Adjola Lakra ka bashkëpunuar me Sebastjan Malin dhe Viktor Markun për ekzekutimin e Billës. 26-vjeçarja dyshohet se ka marrë në telefon Hekuran Billën para krimit, dhe i ka lënë takim, në zonën e Komunës së Parisit, aty ku po e prisnin vrasësit.
Me arrestimin e Lakrës, shkon në tre numri i personave lidhur me këtë ekzekutim. Të arrestuarit janë Viktor Marku dhe Sebastjan Mali, vëllai dhe nipi i Prel Markut, ky i fundit i vrarë në 2006 nga Hekuran Billa në Angli.
Viktor Marku dhe Sebastjan Mali e kanë ndjekur prej shumë kohësh Billën, ndërsa kanë mësuar se ai shoqërohej me Adjola Lakrën, të cilën kanë filluar ta ndjekin më vonë.
