Kryeministri i Kosovës, Ramush Haradinaj ka deklaruar se tashmë procesi i dialogut është në duar të sigurta dhe se nuk flitet më për ndarje apo ndryshim kufijsh.
Sipas Haradinajt, procesi i dialogut i është hequr nga duart Mogherinit dhe tashmë e kanë në përgjegjësi Merkel dhe Macron.
“Tani procesi është në duar të sigurta, i është hequr nga duart zonjës Federica Mogherini. Tani e ka në dorë kancelarja Angela Merkel dhe presidenti Emmanuel Macron. Nuk rrezikojmë ndonjë propozim për ndarje, ka një stabilitet dhe kjo është kryesorja”, u shpreh Haradinaj.
“Mogherini tha në Tiranë që të hiqet taksa se ndryshe do e ndajë Kosovën menjëherë. Shtetet e Bashkuara të Amerikës nuk janë tërhequr asnjëherë nga roli i tyre në proceset në Kosovë dhe SHBA-ja e di kur të marrë përgjegjësitë në proceset e caktuara. Rusia është tërhequr nga Ballkani, ne nuk e parashikojmë në asnjë axhendë tonën, ne nuk jemi pjesë e botës së Rusisë, por e botës së Amerikës”, shtoi ai.
Më 1 korrik do të mbahet takimi i ardhshëm Gjermani, Francë, Serbi, Kosovë, me shpresën që procesit të normalizimit të marrëdhënieve mes dy vendeve, t’i jepet një shtysë tjetër.
Denonco ne TT