Ish-kryebashkiaku i Durrësit, Vangjush Dako, në një intervistë për ‘Repolitix’ më 8 qershor, është shprehur se pret nga kryeministri Rama që të shpërblehet për punën e bërë, me ngritje në detyrë.
Dako u tërhoq nga kandidimi i zgjedhjeve vendore të 30 qershorit, duke ia lënë stafetën Valbona Sakos pas 12 viteve. Departamenti i Shtetit vendosi sot ish-kryetarin e Bashkisë së Durrësit, Vangjush Dako, në listën e personave që u ndalohet hyrja në Shtetet e Bashkuara së bashku me familjen.
Po çfarë ka thënë ai në qershor të këtij viti?
“Njerëzit nuk manipulohen, përkundrazi, mendoj që më kthehet në një avantazh në të kundërt të politikës. Njerëzit janë të mençur, njerëzit njohin drejtësi dhe njohin realitetin. Nuk kam luksin të vendos pozicion, unë do të jap kontribut për PS për të arritur fitoren në 2017, 2019, 2021, 2023, e me radhë”.
Vangjush Dako bëhet zyrtari i tretë nga Shqipëria që i ndalohet të hyjë në Shtetet e Bashkuara së bashku me familjen. Para tij, e njëjta masë është marrë ndaj ish Prokurorit të Përgjithshëm, Adritaik Llalla dhe ish-deputetit socialist, Tom Doshi.
