Ish-deputeti i Partisë Demokratike, Azgan Haklaj, ka thënë në një intervistë për “Euronews Albania” se Sali Berisha dhe Ilir Meta kanë qenë të interesuar për vrasjen e Lulzim Bashës, për ta marrë PD-në me dhunë. Ai madje shkon edhe më tej duke thënë se edhe protesta e 8 janarit ishte një tentativë për të vrarë Bashën.
“Çfarë ndodhi në 8 janar, ishte një tentativë tjetër për të vrarë Bashën. Berisha tha se po shkojmë të shpëtojmë selinë nga vëllazëria myslimane e Tetovës, ndërkohë që aty nuk kishe asnjë tetovar apo asnjë nga Mali i Zi. Ishin të gjithë demokratë të PD-së. Berisha hodhi akuza për t’i dhënë karaktere fetar brenda PD-së. Më 8 janar kishim grusht shteti. Basha mbylli dyert për të shmangur dhunën”, tha Haklaj.
Sipas tij, Berisha s’ka asnjë program ekonomik, thjesht demagogji për njerëzit që e ndjekin. Në protestën e 8 janarit kishte si objektiv marrjen nën kontroll të selisë së Partisë Demokratike nga ana e Berishës dhe mbështetësve të tij.
Dhuna e shpërthyer u frenua vetëm nga ndërhyrja e forcave të policisë. Pas ngjarjeve të 8 janarit, PD vendosi përjashtimin e z. Berisha nga anëtarësia, ndërsa 9 deputetë të tjerë u përjashtuan apo pezulluan, një masë që u shtri dhe ndaj 19 mbështetësve të ish-kryeministrit.
