Deputetja e opozitës parlamentare, Rudina Hajdari, ka apeluar për ‘paqe’ me njëri-tjetrin. Ajo dënoi nga salla e Kuvendit atë që po ndodh me numrin e viktimave të pandemisë. Nga foltorja e Kuvendit, Hajdari i ka bërë thirrje politikës në vend, që të ndalojnë akuzat e sulmet, duke theksuar se në situatë ku ndodhet vendi me pandeminë, duhet solidaritet.
“Nuk mund të bëjmë politikë me këtë situatë, duhet të ngrihemi në dinjitetin njerëzor, sepse shqiptarët kërkojnë që ne t’i japim siguri. Nuk mundet që ne sot të flasim e të sulmojmë njëri-tjetrin. Të mblidhemi si mazhorancë, si opozitë, si profesionistë dhe të shtrijmë dorën për të krijuar një komitet që do të bëjë një strategji të qartë si do të ecim me këtë pandemi.
I bëj thirrje të gjithëve në këtë sallë e jashtë kësaj salle të lemë politikën, të mos zihemi me njëri-tjetrin. Qytetarët janë të lodhur, duhet t’u tregojmë atyre dinjitetin për ta përballuar së bashku. Nëse nuk arrijmë në lartësinë e duhur për të përballuar këtë situatë, nuk duhet të jemi në këtë sallë”.
