Deputetja Rudina Hajdari ka reaguar ashpër në lidhje me ngjarjen e rëndë të ndodhur mesditën e sotme në Elbasan, ku mbeti i vrarë 56-vjeçari, Pjerin Xhuvani.
Gjatë një prononcimi për mediat, Hajdari deklaroi se vrasja është politike, dhe se grupet e dy partive të mëdha vrasin njerëz për të marrë qoftë edhe një mandat më shumë.
Ndër të tjera, ajo u shpreh se qyteti i Elbasanit është damkosur sot si qyteti i bandave.
Rudina Hajdari: ”Sot në Elbasan ka ndodhur një ngjarje shumë e rëndë, është një vrasje politike. Është një gjë për t’u shqetësuar, unë po mundohem të informohem me Ardi Veliun mbi këtë ngjarje. Ajo që është e patolerueshme është se kjo ngjarje është e frymëzuar nga bandat politike që duan të marrin votat e qytetarëve me armë, me lekë. Ajo çka di unë është që kjo ngjarje është e frymëzuar 100% nga prapaskenat politike. Këta janë në gjendje të bëjnë çdo gjë për të marrë votat, janë në gjendje të vrasin njerëz për një apo dy mandate politike. Qyteti i Elbasanit është damkosur sot si qyteti i bandave, dhe për këtë duhet të fajësojmë politikën.”
