Deputeti i ri i opozitës, Ralf Gjoni ka reaguar pas lajmit se pas mbarimit të emisionit “Open” bëri sherr me grushte në zyrat e Top Channel me Salianjin.
Siç u tha, nga punonjës të TCH, pas debatit në studio, Gjoni dhe Salianji u goditën në shkallët e televizionit duke fyer e sulmuar njëri-tjetrin. Ishte Salianji ai i cili e sulmoi i pari fizikisht deputetin e ri të opozitës.
Ndërkaq, sapo ka reaguar Ralf Gjoni i cili thotë se muskujt duhen treguar në rrugë dhe idetë në Parlament.
“IDETË NË PARLAMENT – MUSKUJT NË RRUGË!
Çdo ditë që kalon po ma forcon bindjen se Shqipëria ka nevojë për një platformë të vërtetë politike kombëtare, dalë nga vota e lirë dhe e barabartë e shqiptarëve. Politika nga platformë idesh në parlament është kthyer në platformë muskujsh në rrugë. Shqipëria ka nevojë më shumë se kurrë për një kastë të re e të pastër politike që e do këtë vend. Shqiptarët kanë nevojë dhe kërkojnë një projekt të pavarur politik bazuar mbi ide, vizion dhe angazhim konkret për t’i dhënë zgjidhje problemeve reale të tyre. Kjo vjen vetëm përmes ndryshimit të sistemit zgjedhor e përfaqësimit dinjitoz, dhe ne këtë axhendë të panegociueshme do shtyjmë në parlament”, shkruan Gjoni.
Çfarë ndodhi pas emisionit:
Mësohet se pas përfundimit të emisionit, avokati Spartak Ngjela ka zbritur i pari në kafenenë e televisionit, ndërsa gazetari Carlo Bollino u largua direkt. Ish-deputeti i PD-së, Ervin Salianji ishte në korridor, kur Ralf Gjoni zbriti nga ashensori dhe u përball me të. Aty deputeti Gjoni dhe i ka kërkuar llogari Salianjit për faktin që i përmendi familjen gjatë debatit që patën në studio.
“Mos guxo më të ma kujtosh më atë moment. Unë kam familje, turp të kesh! Nuk bëhet fjalë për bojën, por është agresion fizik ndaj familjes sime nga njerëz që zënë pritë në hyrjen e banesës sime. Mos guxo më Salianji të më përdorësh atë episod kriminal për të më kërcënuar,”- mësohet se ka thënë Gjoni. Më pas Salianji e ka goditur me shuplakë.
