I dërguari i posaçëm i SHBA për dialogun Kosovë-Serbi, Richard Grenell ka mbështetur deklaratat e senatorit amerikan, David Perdue.
Ky i fundit ka thënë se nëse qeveria e Kosovës nuk e heq taksën ndaj Serbisë, atëherë SHBA duhet të rishqyrtojë praninë e saj në këtë vend.
Më tej në postimin e tij, Perdue shprehet se SHBA e ka ndihmuar Kosovën këto 20 vite për ruajtjen e paqes me Serbinë. Sipas tij, tashmë është radha e Prishtinës që të luajë rolin e saj.
Grenell e ka ripostuar statusin e senatorit nga Georgia në faqen e tij në Twitter.
“Për më shumë se dy dekada, forcat amerikane kanë ndihmuar në ruajtjen e paqes mes Kosovës dhe Serbisë. Tani, me progresin e bërë historik, Kosova duhet të bëjë pjesën e vet dhe të shfuqizojë të gjitha detyrat e vendosura ndaj Serbisë. Nëse Kosova nuk është plotësisht e përkushtuar për paqe, atëherë SHBA. duhet të rishqyrtojë praninë e saj atje”, shkruan Perdue në postimin e tij.
