Ministrja e Shëndetësisë, Ogerta Manastirliu, ka sqaruar opinionin publik në lidhje me deklaratën e saj sa i takon pasaportës së vaksinimit për të hyrë në lokale. Manastrliu tha se në varësi të ecurisë do të vlerësohen opsionet, dhe “Green Pass” është një nga këto.
Ministrja Manastirliu sqaroi më tej se vendosja me detyrim e “Green Pass” në shkolla për studentët, ka ndihmuar në rritjen e përqindjes së vaksinimit duke e çuar në 30%, por sipas saj është ende larg qëllimit.
“Për të qenë preçize për atë që deklarova. Ne jemi duke vlerësuar dinamikën e pandemisë. Do të shohim se si do të përballemi me ecurinë e infektimeve. Të gjitha opsionet janë në tavolinë, edhe vendosja e “Green Pass” është një nga këto.
E kemi vendosur për studentët, dhe ka pasur një rritje e studentëve që janë vaksinuar. 30% e grupmoshës 18-24 janë vaksinuar, por jemi akoma larg. Ne duhet të vaksinojmë edhe 1 milionë 170 mijë qytetarë. Kemi bërë mbi 1 milionë e 900 mijë”, u shpreh ajo.
