Policia e Tropojës, ka bërë të mundur arrestimin e dy personave, pasi i vodhën çantën e dorës një gruaje, e cila është ifdentifikuar me inicialet S.B.
Kjo e fundit, kallëzoi në polici ngjarjen e ndodhur në qytetin verior, ku tregoi se gjatë rrugës për në banesë, dy persona i kishin vjedhur me dhunë çantën e dorës. Brenda çantës, ajo posedonte një sasi parash dhe një telefon.
Të arrestuarit, janë dy të rinj nga Kosova, të identifikuar si Visar Madani, 21 vjeç dhe Rinesa Raçi, 18 vjeçe.
”Gjatë kontrollit të ushtruar nga Policia në dhomën e një hoteli në qytetin e Tropojës, ku ishin akomoduar autorët u gjetën dhe sekuestruan sendet e vjedhura: 1 aparat celular dhe një sasi lekësh. Gjithashtu janë gjetur 9 fishekë pistolete, 4 telefona celular dhe maska anticovid që dyshohen se i kanë patur me vete gjatë kryerjes së vjedhjes.”, informon policia.
Materialet hetimore i kaluan Prokurorisë së Rrethit Gjyqësor Tropojë, për veprat penale “Vjedhja me dhunë” kryer në bashkëpunim dhe “Mbajtja pa leje e municioneve luftarake”.
