Gjykata e Tiranës ka pushuar një nga procedimet për protestat e kryera në Unazën e Re, ku nën hetim ishte edhe ish-deputeti demokrat, Klevis Balliu. Prokuroria ka kërkuar pushimin e hetimeve për organizim dhe tubim të paligjshëm.
Në një deklaratë për mediat, ish-deputeti Klevis Balliu tha se çështja u pushua për mungesë provash. Ai u shpreh më tej se pretendohet se i ka thyer krahun një polici. Po sipas tij, të gjitha janë mekanizma politikë, që qeveria përdor ndaj opozitës dhe qytetarëve.
“Janë me qindra persona të hetuar për protestat e Unazës. Pushim i çështjes tregon se gjithçka është politike. Nuk ka si të ndodhë ndryshe, kur Policia e Shtetit drejtohet nga sigurimsa si Gjovalin Loka etj.
Këta nuk është se nuk kanë prova për këtë gjë, nuk kanë prova për asgjë ndaj opozitës. Është Edi Rama ai që po vjedh shtëpitë e qytetarëve, për të ndërtuar kulla. Pse nuk ka hetime ndaj Salillarit?
Këta qytetarë kanë qenë nëpër burgje, dikujt i kanë dëmtuar këmbën. Kjo është një qeveri hajdute dhe do marrë fund. Pretendohet se i kam thyer krahun një polici. Të gjitha janë mekanizma politikë që qeveria përdor ndaj opozitës dhe qytetarëve.
Ne jemi sot të gjithë bashkë, zgjedhjet po vijnë e do i shpartallojmë në zgjedhje. Këtë rebelim mbarë-kombëtar nuk ka gjë që e ndal.
Komisariati numër 6 që ka nisur procedimet, ka qenë banda e Saimir Tahirit”, tha Balliu.
