Deputeti i Partisë Konservatore, Kujtim Gjuzi, në fjalën e marrë në Kuvend tha se LSI-ja prej 30 vitesh ka mbajtur në këmbë PS-në. “Meta ju ka mbajt këtu 30 vite. Po mos ishin ata të dy, Meta dhe Monika dibrania jonë, PS s’do ishte shumicë sot këtu. I keni votat për ta shkarkuar presidentin, apo nuk doni?”.
Ai më tej ka ngacmuar edhe Gramoz Ruçin, ndërsa i kërkonte llogari pse seanca nisi me vonesë. Madje ai shkon edhe më tej duke e provokuar, se mund të jetë dikush për ta gjuajtur me bojë. Ai shtoi më tej se pavarësisht hatërmbetjeve mes palëve, klasa politike duhet të bëhet bashkë për shqiptarët.
“Kryetar i Kuvendit, je nip i Ali Pashë Tepelenës. S’mund ta nisim me një orë vonesë. A ka më njeri me të gjujt me bojë? Kanë ardhur njerëz të kulturuar sot këtu.
Ralf të lutem, kam konsideratën më të lartë për mbiemrin tënd. Ne duhet të vendosim e vendosëm këtu parametra. Qoftë baca që është Sali Berisha, qoftë Basha që është dhëndri i kryetarit të Kuvendit, doni s’doni, le ta konfirmojë që s’është kështu. Thuaj që se kam krushk Lulzim Bashën, jemi për ti thënë shqiptareve që ne do bashkëpunojmë të gjithë bashkë, e s’mund të na thotë njeri tradhtar.
Ç’rëndësi ka me fut Ruçin në burg tani 70 vjeç sa është, po pse ta burgosim? Po u nxeh Tirona është e vështirë me u mor vesh me ne sot. 3 biznesmenë çek kanë ardh më kanë taku, në 11 të natës kam qenë në zyrat e Kuvendit. Më thanë s’na lejnë me investu, na kërkojnë para. Nëse do i kërkoni para njerëzve, PS do dalë në opozitë, kërkoni përsëri gjakderdhje e vëllavrasje?
Ata që kanë përgjegjësi duhet ta kuptojnë që ka mbaruar koha e tyre, jo ne nuk e burgosim bacën. I themi rri aty se është rrit djali”, tha Gjuzi.
