Ministrja e Drejtësisë, Etilda Gjonaj, e ka cilësuar si të patolerueshme dhunën që u përdor dje në protestën e opozitës.
Në një komunikim për mediat, ajo tha se të gjithë ata që nxitën dhunën, duhet të dënohen. Ministrja Gjonaj shtoi më tej se këto akte dhune dëmtojnë integrimin e Shqipërisë.
Duke qëndruar në të njëjtën linjë, ajo kërkoi që të bëhet drejtësi për policët e dhunuar. Sipas saj, opozita e nxiti këtë situatë, për shkak të ‘drejtësisë së re’.
“Dhuna është e papranueshme. Të gjithë ata që kanë nxitur dhunën, do të marrin dënimin sipas ligjit. Shqiptarët panë dhe kuptuan që protesta e djeshme nuk janë protesta për interes të qytetarëve, por për organizatorët.
Zbatimin e Reformës në Drejtësi e penguan me lloj e soj mënyrash për të ruajtur ndikimin politik.
Në këto akte dhune, dëmtohet Shqipëria duke penguar që të ecim përpara në rrugën e Integrimit Europian.
Këto shfaqje të shëmtuara e dëmtojnë Shqipërinë në sytë e shteteve të tjera, por jemi të vendosur për të ecur para”.
