Zëdhënësi i presidentit, Tedi Blushi ka reaguar ashpër pas zhvillimit të konferencës së Prokurorisë, ku ishte prezente edhe ministrja e Drejtësisë, Etilda Gjonaj.
Përmes një postimi në Facebook, Blushi shprehet se Gjonaj akuzohet për 4 vepra penale dhe se Prokuroria duhet të kishte vepruar ndaj saj.
Ai e konsideron këtë gjë si të turpshme, teksa shton se herën tjetër do të mblidhen edhe më shumë shqiptarë për të manifestuar kundër këtyre padrejtësive.
Postimi i plotë:
Tallja me Reformën në Drejtësi dhe bërja e ligjeve puçiste anti-kushtetuese pati meritë të madhe për të mbledhur kaq shumë shqiptarë kundër grushtit të shtetit, ku Ministrja e Drejtësisë, siç është provuar nga shkresat zyrtare, akuzohet për 4 vepra penale. Ndërsa të gjithë prisnin që Prokuroria të vepronte ndaj saj, sot e shohin si pjesë të frontit të Ramaformës në konferencën e Prokurorisë duke qenë edhe krenare! Pandëshkueshmëria, Padrejtësia dhe Pafytyrësia kanë arritur majat! Herën tjetër do mblidhen shumë herë më shumë se dje, shqiptarë të ndershëm dhe me dinjitet, që s’mund të pranojnë këtë Kryemaskaradë! TURP! SHAME ON YOU!
