Një tjetër biznes është ndëshkuar nga aksioni anti-informalitet. Kryeministri Edi Rama ka deklaruar se depozita në Porto Romano të Durrësit është zbuluar duke hedhur në treg karburant pa akcizë, përkatësisht ka rezultuar me mangësi në deklarimet e 233 mijë litra benzinë dhe për këtë arsye, sipas tij, është aktivizuar masa ligjore ndaj subjektit.
Në videon e publikuar nga Rama në “Facebook”, thuhet se kompania është gjobitur me një shumë prej 350 mijë euro.
Po ashtu, në terren ndodhej dhe ministrja e Financave dhe Ekonomisë, Anila Denaj, e cila paralajmëroi të gjitha subjektet e produkteve të akcizës të deklarojnë publikisht dhe rregullisht produktet e tyre. Ndërsa shtoi se aksioni për kontrollin e bizneseve që tregtojnë produkte të akcizës do të zhvendoset në Fier.
“Muaji gusht është i fokusuar totalisht në kontrollin e produkteve të akcizës. Është e rëndësishme të theksojmë që kjo punë po bëhet në një analizë të plotë javore dhe me evidenca të çdo shkeljeje si kjo e sotshmja. Sasia që mungon është e konsiderueshme. Hedhja e kësaj sasie jashtë parametrave ligjorë, jo vetëm që gjobitet, por është dëshmi e aktivitetit të paligjshëm të disa bizneseve, të cilat sot po goditen. Dhe ne do të jemi aty çdo ditë për të kuptuar masën e evazionit dhe arritjen e objektivave për ta luftuar atë në totalitet.
Nuk do të jemi vetëm në Porto Romano, por do të zhvendosemi dhe në Fier. Ky aksion nuk është vetëm për pikat e karburantit, por dhe për pijet alkoolike, duhanin, kafen dhe çdo produkt tjetër”, tha Denaj.
https://www.facebook.com/edirama.al/videos/2381793275442648/?t=1
