Gazetari Jakup Gjoça, gjatë takimit me kreun e PD-së Basha me gazetarët, është shfaqur mjaft i indinjuar.
Ai tha se sot duhet të kishte bojkot nga ana e medias, pasi dje në protestë dy gazetarë nuk u lejuan të bënin punën e tyre nga Policia e Shtetit.
Gjoça e quajti Bashën një oligark politik, ndërsa i kërkoi i revoltuar që të lërë hipokrizitë dhe të mos ndikojnë në lirinë e medias.
Fjala e plotë e gazetarit:
Liria e medias u vra dje kur PSH pengoi dy gazetarë të transmetonin. Sot prisja që të kishte bojkot kombëtar.
I drejtohem kryetarit të opozitës, Lulzim Bashës. E ndjeni veten ju që jeni një oligark politik? Pse, jam munduar të mos pasqyroj deklaratat publike sepse lexuesi i sheh disa herë në TV. Jam munduar disa herë të krijoj tema, të ngre probleme duke kontaktuar me deputetët të PD-së, e di çfarë më kanë thënë? E para nuk më janë përgjigjur fare disa, e dyta, të tjerë më kanë thënë që nuk mund të flas sepse duhet të marr leje. E dini pse ndodh kjo?
Sepse ju jeni oligark politik, duke qenë se keni listat në dorë, asnjë politikan nuk ka interes të afirmohet publikisht, të ketë personalitetin e tij, dhe ky personalitet afirmohet edhe me median, duke dhënë mendimin e tij, jo duke lexuar si papagall ndonjë deklaratë. Unë nuk kam botuar dhe nuk kam ndërmend të botoj asnjë deklaratë publike, pse? Sepse nuk shprehin dhe nuk kanë ndonjë interes publik. Nqs do kishim një sistem elektoral në të cilin votuesi do të votonte njeriun dhe jo listën, atëherë të jini të ndërgjegjshëm që nuk do ishit më oligark politik, dhe i votuari do jepte mendimin e tij. Këto janë problemet kryesore që na shqetësojnë, nuk kam parë të ndihem i sigurt se kam një mbështetje. Nqs doni, i lini hipokrizitë. Nuk më pëlqeu fare që folën drejtuesit e shoqatave këtu, duhet të kishin folur gazetarët dhe kush janë gazetarë të thjeshtë si puna ime, kolegët e mi, reporterët. E papranueshme që një media të japë fjalën e kryeministrit live 2 orë, ndërkohë që gazetari dhunohej.
