Gazetari i gazetës gjermane “Bild”, i cili publikoi pak ditë më parë një artikull për Shqipërinë, ku shkruante për mënyrën se si vendi udhëhiqet nga kriminelët dhe gangsterët, paralajmëron se do të zbardhë përgjime telefonike për blerjen e votave në zonën e Durrësit dhe të Shijakut.
Pieter Tiede bën me dije se publikimet do të botohen nesër, ndërsa thekson se bëhet fjalë për gjashtë regjistrime telefonike në gjuhën shqip dhe të përkthyera në anglisht.
“Përshëndetje, kam një histori të re … do të botohet sonte ose nesër në mëngjes … Shijak dhe Durrës … blerje votash nga ana e Partisë Socialiste … Me gjashtë regjistrime të plota – përgjime telefonatash … në shqip dhe përkthyer në anglisht … Ajo që kemi janë regjistrime – ne do të kemi gjashtë regjistrime në gjuhën shqipe në faqen tonë të internetit. Shembuj nga rasti i Astrit Avdylit. Telefonata të bëra me politikan dhe votues”, shkruan Tiede.
