Ardi Veliu u largua dje nga detyra e Drejtorit të Përgjithshëm të Policisë së Shtetit. Në letrën e dorëheqjes, Veliu thotë se ka vendosur të mos kërkojë një mandat tjetër, me qëllim që t’i përkushtohet më shumë familjes së tij. Ka qenë vetë kryeministri Edi Rama i cili ka publikuar lajmin dhe letrën e dorëheqjes, ku vlerëson Veliun për kontributin e dhënë, ndërsa lë të hapur mundësinë për emërimin e tij në një tjetër post.
Kjo dorëheqje vjen 10 ditë para përfundimit të afatit 100 ditor, që kryeministri Edi Rama kishte vënë për riorganizimin e Policisë së Shtetit dhe vendosur prioritete të qarta.
Kryeministri kërkoi që punonjësit e policisë të përfshirë në afera korruptive, ryshfeti dhe ata oficerë që “luajnë me dy porta”, të largohen nga radhët e uniformave blu dhe të dalin përpara përgjegjësisë penale.
Gazetari Elton Qyno ka deklaruar në “Ora e Betit” në RTV Ora se Veliu kishte 3-4 oligarkë që i vinin te shtëpia, individë që ndërtojnë rreth e qark Unazës.
Ai tha se ky është zyrtari i parë që kishte krijuar konflikte me dy ministrat; Sandër Lleshajn që nuk e pyeste fare dhe me Bledi Çuçin.
“Veliu kishte 3-4 oligarkë që i vinin te shtëpia, këta që ndërtojnë rreth e qark Unazës. Ishte ky efektivi që dilte në përgjimet e Ndraghetës që merrte sallamin e derrin. Ky nuk e kishte mirë vetëm me Ramën, por edhe me tarafin e tij që lëvronte lekët”.
