Në 27 dhjetor pritet që të vaksinohen personat e parë në Greqi. Mediat greke njoftojnë se janë në pritje të vaksinës Pfizer kundër COVID-19, në numër më të vogël dozash. 27 dhjetori është një nga tre datat e përcaktuara nga presidentja e Komisionit Evropian, Ursula von der Leyen për të nisur vaksinimin në mbarë Evropën.
Fushata e vaksinimit për Covid do të nisë me dy persona si fillim, ato janë një infermiere dhe një i moshuar, identiteti i të cilëve nuk është bërë publik. Pritet që fillimisht të realizohen 100 vaksinime simbolike në stafin mjekësor, në frontin ballor kundër COVID-19, në dy spitale të mëdha të vendit, Evangjelismos dhe Sotiria më 27 dhjetor.
Ndërkohë vijon regjistrimi i stafit mjekësor si dhe grupmoshave në rrezik të lartë. 1086 janë qendrat e vaksinimit në të gjithë Greqinë, teksa do jenë dy operacione paralele për funksionimin, “Liria” e sistemit shëndetësor për vaksinimin dhe “Ipokratis” i policisë për shpërndarjen e sigurtë dhe sipas standarteve specifike. Të enjten në Selanik kanë mbërritur edhe frigoriferët ku do të mbahet vaksina. Kujtojmë që vaksina e Pfizer/ Biontech kërkon një temperaturë -70 gradë.
