Tërmeti i të martës shembi ndërtesat, por ndërtoi solidaritetin mes shqiptarëve. Të gjithë, i madh e i vogël, sipas mundësive kanë dhënë kontributin e tyre për të prekurit nga tërmeti. Nisma e “Fundjavë Ndryshe” ka vendosur një rekord të paprecedentë.
Për vetëm 48 orë janë grumbulluar 1.4 milionë dollarë. Shqiptarët anë e mbanë botës i janë bashkuar nismës së “Fundjavë Ndryshe” duke dhënë kontributin e tyre. Kjo shifër u arrit vetëm falë dashurisë që shqiptarët kanë për vendin e tyre dhe njëri-tjetrin.
Kjo shumë është arritur falë bashkëpunimit me rreth 16 mijë njerëz, të cilët kanë dhuruar përmes platformës online. Ka pasur një sensibilizim mbarëkombëtar. Përfshi këtu njerëz të njohur, figura publike, artistë, njerëz të sportit, që kanë kontribuar nga e gjithë bota.
Arbër Hajdari, Themelues “Fundjavë Ndryshe”, ka shprehur mirënjohjen e tij të thellë për të gjithë ata që kontribuan. “Jemi popull i vogël, por me dashuri të madhe për njëri-tjetrin”. Ai sëbashku me stafin dhe rrjetin e vullnetarëve të “Fundjavë Ndryshe”, që pas orëve të para të së martës janë në terren, në ndihmë të gjithë banorëve të prekur dhe atyre që kanë nevojë.
“Shtëpia e shqiptarit është e mikut dhe e Zotit”, thuhet në kodin zakonor shqiptar. “Fundjavë Ndryshe” mirëpret “Në qendrën e solidaritetit Fundjavë Ndryshe” të gjithë ata që kanë nevojë për një strehë dhe një mik në këto ditë të vështira.
“Bamirësia nuk Varfëron”
