Mblidhen 62 mijë dollarë për familjen e Arjan Salës, i shpallur “Dëshmor i atdheut” për aktin e tij heroik të shpëtimit të 25 kolegëve të tij në zjarrin që ra në një qendër tregtare.
Iniciativa erdhi nga drejtuesi i “Fundjavë Ndryshe”, Arbër Hajdari dhe drejtuesit të emisionit “Stop” në TV Klan, Saimir Kodrës.
Iniciativa që u bë pjesë e emisionit “Opinion”të Blendi Fevziut, zgjoi kureshtjen e qytetarëve të cilët arritën të mblidhin brenda 1 ore të transmetimit live një shumë rreth 30 mijë dollarë në ndihmë të familjes.
Por, drejtuesi i “Fundjavë Ndryshe”, Arbër Hajdari, bëri të ditur se deri më tani kanë kontribuar 1.200 shqiptarë për familjen e Arjan Salës, dhe shuma ka arritur në 62 mijë dollarë.
”Arjan Sala ka pasur mbështjetjen e shumë shqiptarëve. Nisëm mbledhjen e fondeve në bashkëpunim me emisionin Stop dhe Opinion për të siguruar të ardhmen e djalit të heroit. Deri tani kanë dhuruar 1200 shqiptarë dhe janë mbledhur 62.000 dollarë. Mirënjohje secilit prej jush!’’, shkruan Hajdari në rrjetin social, Facebook.
Trupi i 32-vjeçarit Sala u gjend pas tri ditësh teksa kishte rënë zjarr në magazinat e qendrës tregtare. Sipas të dhënave të para hetimore bëhet fjalë për një shkëndijë elektrike, por hetimet vijojnë për të zbardhur ngjarjen që I mori jetën punonjësit të sigurisë, baba i një djali katërvjeçar.
