Nënkryetari i PD-së Edi Paloka ka reaguar pas fshirjes së postimit nga gazeta gjermane “Bild”.
I ftuar në studion e Ora News, Paloka sqaroi se Partia Demokratike nuk ka të bëjë me fshirjen e këtij postimi. Ai tha se ky lajm ka qëndruar vetëm 2 orë i publikuar dhe ata që e kanë shpërndarë kanë qenë duke pritur atë.
“As që bëhet fjalë që ne të ndërhyjmë për gjëra të tilla. Është Balla dhe Fuga që merren me futje dhe nxjerrje lajmesh të rreme me pagesë nëpër mediat e tjera por mesa duket me BILD nuk i eci. Madje duke bërë shaka thamë mos u ka ngritur ndonjë kurth “Bild” sa e bëri Taulantin të lëpinte të gjithë pështymat që kishte hedhur për BILD, kur ajo publikoi përgjimet për vjedhjen e votave. Dy orë qëndroi ai publikim online. Ata që e prisnin e morën menjëherë ta shpërndanin”, tha ai.
I pyetur nëse Partia Demokratike kishte ndonjë ide se ‘Bild’ do të publikonte një shkrim të tillë, Paloka tha se “Nuk punon njeri nga PD tek ‘Bild’”. Sipas Palokës, lajmi i publikuar është një sajesë e bërë nga qeveria, e cila ka paguar për publikimin e tij në këtë media.
“Janë sajesa të bëra në zyrën e Ramës. Janë çuar atje dhe është paguar për ti botuar. Edhe drejtësia e kapur nga Rama nuk arriti ti vërtetojë, sepse ishte një përrallë e trashë, sa as sigurimi i shtetit nuk do e bënte kaq të trashë.
Çfarë përpiqen tu mbushin mendjen shqiptarëve se Basha bleu Putin e Trump që të pengonte integrimin e Ramës. Ju mendoni se Taulant Balla e mban hapur BILD dhe sapo doli e mori të bëjë share? Kaq mjafton të kuptohet. Publikimi erdhi menjëherë pas tryezës për reformën zgjedhore”, shtoi ai.
