Kryeministri Edi Rama dhe presidenti Ilir Meta kanë shpërndarë një mesazh në profilet e tyre përkatëse në “Facebook”, teksa u bëjnë thirrje qytetarëve që t’u rikthehen jetës së përditshme dhe qetësisë, pasi nuk ka vend për panik.
Përmes një postimi të dytë, Rama shprehet se është e domosdoshme të mos dëgjohet çdo gjë që del në media.
“Dhe me lutjen që mos t’ua vini më veshin të dalëve nga mendja, të cilët siç e patë edhe njëherë mbrëmë, janë të gatshëm të ndjellin e gatuajnë deri në fund, më të keqen e të keqes për këtë vend e për këtë popull; si edhe me apelin miqësor që sot gjithkush të rikthehet në jetën normale (e më mirë ju demokratët këtu më shani mua sa të doni, se sa të trembeni nga ata që parashikojnë tërmete?), ndërkohë që ne do të vijojmë me përkushtim punën në mbështetje të familjeve më të prekura, ju uroj të gjithëve pa përjashtim, një ditë të zakonshme për veten e për familjet tuaja”, shkruan Rama.
Po ashtu, edhe kreu i shtetit, Ilir Meta, krahas një fotoje të publikuar, përcjell një mesazh qetësimi për të gjithë shqiptarët e përfshirë nga paniku pas tërmetit dhe lajmeve të rrema për lëkundje sizmike të fuqishme.
“Mirëmëngjes të dashur miq,
Me rëndësi është t’i kthehemi jetës së përditshme dhe qetësisë në familjet tona!
Ju uroj një javë të mbarë!”, nënvizon presidenti.
