Sikundër ishte njoftuar edhe më herët, sot pritet të mbahet protesta e radhës nga ana e opozitës, paralel me seancën plenare. Protesta do të zhvillohet para Parlamentit, për të kërkuar një qeveri tranzitore dhe zgjedhje të parakohshme pa Edi Ramën kryeministër.
Ndonëse protesta është njoftuar rreth orës 10.00, Policia e Shtetit e ka nisur punën për mobilizimin e saj që në orët e para të mëngjesit.
Pa shkuar ende ora 07.00, janë parë një sërë automjetesh të policisë, ku janë pozicionuar rreth zonës ku do të zhvillohet sot protesta e radhës.
Në ndryshim nga protestat e shkuara, ku qytetarët kanë qenë fokusuar në hyrje të Parlamentit, opozita ka një tjetër plan, që konsiston në shpërndarjen në 6 pika.
Sipas hartës, pikat e rrethimit janë secila prej rrugëve që lidhet me Parlamentin: hyrja kryesore, hyrja nga qendra tregtare Toptani, hyrja nga ish-selia e Partisë Demokratike, hyrja nga rruga tek Bashkia, hyrja nga Pedonalja dhe hyrja nga Unaza, pranë PD.
