Mediat e huaja raportojnë se Franca është tërhequr nga operacionet detare të NATO-s në Mesdhe, pas hetimeve mbi një incident detar të mëparshëm me Turqinë.
Zhvillimi i fundit është një tjetër mosmarrëveshje mes aleatëve të NATO për territoret ujore dhe për Libinë.
Në muajin qershor Franca akuzoi Turqinë se po provokonte luftanijet e saj në lindje të Mesdheut. Autoritetet franceze pretendojnë se gjatë inspektimit të një anijeje për ngarkesa të jashtëligjshme drejt Libisë, luftanijet turke shenjëstronin vazhdimisht me radarët e tyre mjetin francez. Por, Turqia e ka mohuar kategorikisht këtë.
Në lidhje me këtë çështje është kryer edhe një hetim nga NATO, por një zyrtar i saj tha se rezultatet e investigimit janë të klasifikuara dhe do të diskutohen mes aleatëve.
Dy vendet kanë pasur disa mosmarrëveshje detare për Libinë. Franca mban anën e Qipros dhe Greqisë në debatin me Turqinë për shpimet e naftës.
