Pas akuzave të presidentit të SHBA-ve, Donald Trump, ndaj presidentit të Francës, Emmanuel Macron, se ky i fundit dërgoi “sinjale të përziera” në Teheran, ka ardhur edhe reagimi i shtetit francez.
Përmes një deklarate, ministri i Jashtëm francez, Jean-Yves Le Drian, është shprehur se Franca nuk ka nevojë për lejen e shteteve të tjera për të qetësuar tensionet me Iranin.
“Franca flet vetë për Iranin si një fuqi sovrane. Franca është thellësisht e përkushtuar për paqen dhe sigurinë në rajon, është e angazhuar për uljen e tensioneve dhe nuk ka nevojë për ndonjë autorizim për ta bërë këtë”, tha ministri i Jashtëm.
Trump të enjten kishte thënë që askush nuk ishte i lejuar të fliste me Iranin në emër të Shteteve të Bashkuara, pasi një raport këtë javë tha që Macron kishte ftuar Presidentin e Iranit, Hassan Rouhani në samitin e G7 të këtij muaji për të takuar presidentin e SHBA.
