Trajneri i Iranit, Carlos Queiroz, pak ditë më parë ka bërë shaka duke thënë se FIFA duhet ta pezullojë Messi-n “deri në momentin që të provohet se ai është me të vërtetë një njeri”!
“Kam thënë gjithmonë se është një lojtar i jashtëzakonshëm”, ka shpjeguar Queiroz për FIFA.com . “Nuk është normal. Po të ishte njerëzor, nuk do të kishte patur atë moment magjik në atë ndeshje. Zakonisht nuk më pëlqen të humbas, por nuk jam mërzitur për atë humbje. Janë ato momente që e bëjnë futbollin sportin më të bukur në botë. Dhe është një moment akoma më special kur vjen nga një lojtar që nuk duhet lejuar të luajë nga FIFA deri në momentin që nuk është provuar se ai është njerëzor!”.
Gjatë një seance stërvitore të Barcelona-s, të zhvilluara para ndeshjes me Atletico Madrid, që është fituar 1-0 nga katalanasit falë një magjie të Leo Messi-t, argjentinasi është kapur në një fotografi të jashtëzakonshme që tregon, edhe një herë, se ai nuk është njerëzor. Numri 10 i Barcelona-s është kapur duke goditur topin me këmbën e tij të majtë dhe duket se ajo është kthyer në 180 gradë nga gjuri te kavilja. Për një lojtar që është fotografuar mijëra herë gjatë karrierës së tij, ky duhet të jetë imazhi më unik.
