Vijon përplasje mes efektivëve të policisë dhe banorëve pranë gjimnazit “Petro Nini Luarasi” të cilët kundërshtojnë prishjen e banesave.
Banorët janë shfaqur të tensionuar dhe në gjendje jo të mirë shëndetësore teksa bëjnë thirrje që të mos u prishin shtëpitë.
“Mos ma prekni shpinë”, thërret një banore me të qara, teksa mban pranë një vajzë të vogël, e cila duhet thënë se është frikësuar dhe ka qarë nga ulërimat dhe atë që ka parë. 
“Po na pushkatoni” është dëgjuar të thotë një zonjë e kësaj familje, të cilat janë shfaqur në gjendje të rënduar.
“Shtëpia është blerë në 1993, është pronë e shtetit, këta janë të korruptuar! Shtet shkër**atë, ky është më by***iri që kam pa. Kam qenë në Gjermani 9 vjet po kështu s’kam parë”, thotë një zotëri që mban dokumentet në duar, i cili më pas u mor nga policia.
Disa nga familjarët janë ende brenda shtëpisë dhe kanë ndezur një zjarr në oborrin e banesës. Në vendngjarje kanë shkuar edhe forcat zjarrfikëse.
Mësohet se ky truall me vendim gjykate i është rikthyer ish-pronarëve dhe për rrjedhojë IKMK do zbatojë vendimin për shembjen e kësaj banese.
