Ka lënë sot spitalin Infektiv turistja ukrainase e cila rezultoi pozitive me koronavirus në Shqipëri, pak ditë më parë.
Ajo është shëruar plotësisht nga infeksioni, ndërsa do i duhet të qëndrojë e vetëkarantinuar edhe për 14 ditë, si masë për të shmangur infektimin e personave të tjerë.
Ukrainasja është pritur jashtë perimetrit të sigurisë nga i dashuri i saj, i cili ka vendosur ta presë me një buqetë me lule.
Shtetasja nga Ukraina, e cila jetonte prej kohësh në Tiranë kishte udhëtuar drejt Sarandës, ku edhe u konfirmua pozitive me koronavirus.
Ajo u paraqit në Urgjencën e Spitalit të Sarandës pas shqetësimeve shëndetësore, e shoqëruar nga partneri i saj dhe pas testimit të kryer rezultoi pozitive.
