Ministrja e Shëndetësisë dhe Mbrojtjes Sociale, Ogerta Manastirliu bën me dije se 60 infermierët që kanë shkuar për të ndihmuar në luftën kundër koronavirusit në Itali, kanë filluar tashmë nga puna.
Përmes një postimi në Facebook, Manastirliu thotë se infermierët shqiptarë po shërbejnë në zonën e Marche, në disa spitale ku po trajtohen pacientët e infektuar.
“Nisin punën 60 infermierët e grupit të dytë të ekipit shqiptar, të cilët po ndihmojnë Italinë mike në këto ditë të vështira, në zonat ku ka më shumë nevojë për përballimin e situatës së shkaktuar nga #COVID19
Infermierët tanë po shërbejnë në Marche, në disa spitale ku trajtohen pacientët e prekur nga koronavirusi, krah kolegëve italianë. #MëTëFortë #BASHKË????”, shkruan ministrja.
Kujtojmë se 60 infermierë u nisën para ca ditësh në drejtim të vendit fqinj, për t’iu ardhur në ndihmë në përballimin e situatës nga COVID-19. Sapo zbarkuan në Itali, infermierët u pritën në aeroport nga ministri i Jashtëm i Italisë, Luigi di Maio.
Ky është grupi i dytë me personel shëndetësor që niset nga Shqipëria drejt Italisë. Një tjetër grup prej 30 mjekësh dhe infermierësh janë nisur disa javë më parë drejt shtetit fqinj.
