“Ilaçi më i mirë për trupin është agjërimi”, Rama uron besimtarët myslimanë

Kryeministri Edi Rama së fundmi ka publikuar një video në Facebook, përmes së cilës uron besimtarët myslimanë për Muajin e Ramazanit.

Kreu i Qeverisë e lidh urimin e tij me situatën e pazakontë që po kalon Shqipëria, e cila si shumë shtete të tjera të botës është prekur nga koronavirusi.

“Siç këshillonte nëna e besimtarëve, Aisha, në këto çështje mjaftohuni me Kuranin”, shprehet ndër të tjera Rama.

“Më lejoni që t’ju them fjalët e dikujt që nuk ishte as profet, as besimtar ritualist, por ishte shkencëtar, një ndër etërit, themelues të Shteteve të Bashkuara, Benjamin Franklin. Ai thoshte, ilaçi më i mirë për trupin e njeriut është agjërimi dhe pushimi”, vijon ai.

Pjesë e shkëputur nga urimi i kryeministrit për besimtarët myslimanë:

“Të dashur vëllezër dhe motra! Sot hyn ai që në Fenë Islame është pagëzuar si Muaji i Madhërishëm i Ramazanit.

Paqja me veten, pavarësisht vështirësive, pajtim me tjetrin, pavarësisht kundërshtimeve.

Tamam si bota që sot po rrotullohet mbrapsht me një ngadalësi të hatashme duke na imponuar nën syrin e armikut të padukshëm përmbysjen e rregullave të jetës sonë të përditshme edhe vështrimi i njeriut gjatë këtij muaji kthehet mbrapsht.

Në këtë kohë, ku jemi kyçur të gjithë brenda rrethit të ngushtë të familjes, ne shqiptarët si rrallëkush jemi ngushëlluar 3 herë nga trokitjet e kalendarit të besimit.

Dy herë Pashkë dhe nga sot një Ramazan për të lehtësuar zemrat e shumëkujt në këtë vend që siç thuhet në Meshën e Shenjtë ngrihen lart sapo ndjejnë mirësinë dhe dashurinë.

I bekuar ai që vjen në emrin e Zotit, thuhet në Ungjill, i bekuar çdokush që në emrin e Zotit dhe përkujdesjes për tjetrin, vjen të ç’ngrysë vetullat e njeriut, të lehtësojë barrën e të përditshmes me kumtin e të përjetshmes.

Kam guximin t’ju them se e keqja e madhe për të gjithë ka ardhur me të mirat e saj dhe më e mira ndër to duket se është mundësia për të reflektuar me detyrim.

Falenderoj të gjithë besimtarët shqiptarë për vetëdijen e lartë dhe për vendimin e dhimbshëm, por të fortë dhe të drejtë, për të mos u shkëputur nga zinxhiri i rezistencës sonë kombëtare, duke lartësuar kësisoj dhe jo duke turpëruar, Zotin e tyre, me mbajtjen kyçur të tempujve.

Ditët e mira pastaj do vijnë. Nga shtëpitë e Zotit këtu në Shqipëri vjen veçse e mira sepse Kleri i këtij vendi e sheh dhe e do popullin shqiptar si një i tërë.

Ne do të qëndrojmë deri në fund në llogoret tona duke menduar për erëra të mira, për paqe, për të sëmurët, vuajtësit dhe robërit e kësaj flame të verbër e cila nuk do të na e qërrojë dritën e arsyes dhe as do të na e djegë fillin e durimit.

Mos i bëj tjetrit atë që nuk do që të të bëjnë të tjerët. Ky është refleksi në pasqyrë i thelbit të besimit në Zot. Duaje të afërmin tënd si veten tënde. Ky është refleksi në pasqyrën e kësaj lufte që tek vetja duhet të shohim edhe tjetrin.

Ju vëllezër dhe motra të Fesë Islame kështu dëshmuat përsëri gadishmëri për t’u bërë refleksi në pasqyrën e luftës i të gjitha motrave dhe vëllezërve shqiptarë duke u përulur përpara vendimit për mbylljen e tempujve, dhe duke pranuar tavanin e shtëpisë, si një copëz të tavanit të tempullit të munguar.

Islami mirë e di se sa vlen një jetë dhe çka është vërtet e rëndësishme.

Siç këshillonte nëna e besimtarëve, Aisha, në këto çështje mjaftohuni me Kuranin.

Prandaj, sa më i thjeshtuar solemniteti i iftarit këtë vit aq më e pranuar lutja e akshamit.

Sa më të heshtura hapat drejt xhamisë, aq më kuptues zëri i Ezanit pas të cilit shpirti i besimit, do të mbushë shtëpitë tuaja me ngazëllim gjatë iftarit.

Dhe në mbyllje të dashur miq, më lejoni që t’ju them fjalët e dikujt që nuk ishte as profet, as besimtar ritualist, por ishte shkencëtar, një ndër etërit, themelues të Shteteve të Bashkuara, Benjamin Franklin.

Ai thoshte, ilaçi më i mirë për trupin e njeriut është agjërimi dhe pushimi”.

/TIRANA TODAY