Një konflikt në avionin e linjës Tiranë-Romë një ditë më parë u bë shkak që piloti të bënte një ulje të detyruar në Pescara. Mediat italiane shkruajnë sot për detajet e asaj që ndodhi, teksa zbardhin rrëfimin e një gruaje që është gjendur në sediljen ngjitur me shqiptarin 30 vjeçar, dhe madje ka ndërhyrë për qetësimin e situatës.
Ajo është Simona Gori, drejtore e përgjithshme e kompanisë italiane “Consulcesi Group”, e cila ka arritur ta qetësojë situatën.
“Thoshte se kishte një borxh prej 40 mijë eurosh dhe se i kishin marrë peng gruan. Vendosa të ndërhyj duke i thënë se si mund ta ndihmoja. I kërkova të më tregonte historinë e tij”, tregon ajo.
Më tej vazhdon, “Në fillim kisha frikë sepse ai djali po kërcënonte pasagjerët duke u thënë se kishte një pistoletë. Bërtiste fort dhe qëllonte me grushte në fytyrë të atin, i cili po përpiqej ta qetësonte”- thotë ajo.
