Prokurori i Përmetit, Asllan Bajrami është kërcënuar nga persona të paidentifikuar. Ai ka bërë kallëzim në polici, ku ka thënë se në dritaren e zyrës së tij ka gjetur fishek arme. Drejtuesi i Prokurorisë së Shkallës së Parë në Përmet, është kërcënuar për shkak të detyrës. Disa persona ende të paidentifikuar, kanë lënë në dritaren e zyrës së tij një fishek model 56.
Për “Raport TV”, Bajrami është shprehur se ai nuk ka në dorë çështje të ndonjë rëndësie të veçantë, as armiq dhe se nuk ka asnjë emër të dyshuar për ngjarjen.
“Në Prokurori jemi 20 punonjës hetimi, duhet zbardhur se për kë ishte. Unë nuk kam në dorë dosje të rëndësisë së veçantë, nuk kam asnjë armik dhe nuk dyshoj tek askush, ja kam lënë në dorë hetimit”, ka thënë ai.
Mësohet se plumbi i lënë në dritaren e zyrës së prokurorit është në dukje i vjetër, ndërsa dritarja është në anë të rrugës. Nuk dihet ende nëse plumbi është vendosur qëllimisht për të kërcënuar prokurorin.
Lidhur me këtë çështje, një reagim ka ardhur edhe nga kreu i shtetit, Ilir Meta, i cili e cilëson ngjarjen të rëndë dhe të dënueshme. Presidenti ka kërkuar një hetim të shpejtë, për të vendosur para ligjit autorët.
“Kërcënimi për shkak dhe në krye të detyrës i Prokurorit të Përmetit, z.Asllani Bajrami, është një ngjarje tepër e rëndë dhe e dënueshme.
Nevojitet një hetim i shpejtë për vendosjen para ligjit të kujdo, që guxon të kërcënojë përfaqësuesit e shtetit, për t’i penguar ata të ushtrojnë detyrën të pandikuar.
Revanshi i krimit kërkon masa të menjëhershme efektive, reaguese dhe parandaluese, nga të gjitha institucionet e ngarkuara me ligj për mbrojtjen e rendit dhe të sigurisë publike”.
