Gazetari Blendi Fevziu ka komentuar paketën Anti-KÇK dhe aksionet e bëra së fundmi nga Operacioni Forca e Ligjit.
I ftuar në emisionin Java në RTSH, Fevziu u shpreh se kjo nismë është shumë e vonuar dhe se do të duhej të ishte zbatuar me kohë. Ai shton se prokurorët belgë kanë dorëzuar në prokuroritë tona dosje me prona, që buronin nga parat e aktiviteteve kriminale që këta persona kanë zhvilluar në vende të ndryshme të Evropës.
Sipas tij, shumica e njerëzve as nuk e ka lexuar fare aktin normativ në fjalë, duke u keqkuptuar se target do të ishin politikanët dhe korrupsioni i lartë.
“Është një nismë e vonuar, pasi forca e ligjit duhej të kishte vepruar kohë më parë. Edi Rama ka dhënë përshtypjen gjatë takimeve me ndërkombëtarët se kemi bërë gjithçka për kapjen e tyre, por problemi ka ekzistuar tek sistemi i drejtësisë. Kryeministri e kuptoi së fundi se lufta ndaj krimit nuk është thjesht justifikim, por edhe një argument për hapjen e negociatave. Prokurorët belgë kanë dorëzuar në prokurori dosje me prona të kriminalizuara që buronin nga parat e aktiviteteve kriminale të ushtruara nga këta persona në vende të ndryshme të Evropës. Paratë e krimit nuk e kanë ndihmuar kurrë ekonominë e një vend. Në thelb, arrogance e krimit ndaj qytetarit të thjeshtë është arrogancë ndaj ligjit”, tha ai.
