Deputeti i LSI-së, Petrit Vasili, i është përgjigjur Sekretarit të Përgjithshëm të PD-së, Gazment Bardhi, për çështjen e koalicioneve për zgjedhjet e 25 prillit. Në një konferencë për shtyp, Petrit Vasili thotë se s’ka pasur kurrë një propozim për mandate nga PD-ja, duke e quajtur këtë një gënjeshtër. Deklarata e Vasilit pason pasi Bardhi tha se PD i ofroi 15 mandate të sigurta LSI-së, por Kryemadhi e replikoi duke thënë se 34 i siguronte e vetme duke mos pranuar që të futeshin në zgjedhje me një listë të vetme.
“Është momenti për të thënë të vërtetat e mëdha siç janë, dhe për të mos heshtur më. S’ka pasur kurrë një propozim zyrtar nga partia e Bashës, për mandate e numra mandatesh e gjëra të kësaj natyre. Anëtarët e PD-së janë aty, dhe le të thonë nëse ka pasur një propozim të tillë. Faqe e zezë për ata që mashtrojnë, pasi kanë shitur interesat për opozitën për ditën me diell.
Djegia e mandateve kishte plan vetëm garantimin e Ramës në pushtet. E gjithë kjo ishte një mashtrim i poshtër. A ka pasur një dakordësi me PD-në? Po ka patur dakordësi për të zhvillur një fushatë të përbashkët. Kurrë nuk ndodhi, u sabotua, u refuzua me të gjithë mjetet nga Basha i cili nuk mori pjesë në fushatën përmbyllëse të LSI-së. Sepse plani Rama-Basha ishte për shkatërrimin e LSI-së”, tha Vasili.
