Kryetari i Partisë së Lirisë, Ilir Meta, ka shprehur indinjatën për rastin në “Prestige Resort”, ku ka zbarkuar IMKT për të shembur dy pishina. Ai shprehet se aksioni i paligjshëm i IKMT-së në “Prestige Resort” në kulmin e sezonit turistik, është një sulm i drejtpërdrejtë ndaj lirisë dhe pavarësisë së medias.
Ja se çfarë shkruan Meta
KOHA PËR T’I VËNË RRUSPAT REGJIMIT TË RRUSPIJEVE!
Aksioni i paligjshëm i IKMT në “Prestige Resort” në kulmin e sezonit turistik, është një sulm i drejtpërdrejtë ndaj lirisë dhe pavarësisë së medias.
Koha për t’i dhënë fund iluzioneve ndaj një skizofreni që nuk njeh as Kushtetutë, as ligj dhe asnjë të drejtë themelore!
Koha për t’i vënë rruspat regjimit të rruspijeve që po plaçkit vendin dhe shkatërron pronat e ligjshme!
Ervin Salianji: Regjimi nuk njeh ligj dhe normë
Deputeti i PD-së, Ervin Salianji ka thënë se ky shtet nuk njeh norma dhe ligj. Ai citon se kryeministri Rama urdhëron sulmin ndaj “Prestig Resort” në sezon turistik, përdor institucionet shtetërore si lodra personale dhe pa paralajmërim. Për të, ky është mesazhi që godet investitorët, që shantazhon mediat nëpërmjet abuzimit me asetet shtetërore.
“Regjimi nuk njeh ligj dhe normë, shkel dhe dhunon çdo normë demokratike, përpiqet të dhunojë dhe godasë cilindo që mendon ndryshe!
Ndërkohë që Shqipëria po mbytet nga kioskat e ndërtimeve pa leje dhe po zaptohet nga miqtë e regjimit ku po zaptohet çdo copë në bregdet, ndërkohë Edi Rama urdhëron sulmin ndaj “Prestig Resort” në sezon turistik, përdor institucionet shtetërore si lodra personale, pa paralajmërim, pa shkresë, në shkelje të ligjit dhe pa dhënë mundësitë e mbrojtjes dhe garancive ligjore dhe para gjykatës! Ky është mesazhi më i qartë i abuzimit shtetëror! Është mesazhi mafizoz qeveritar që godet investitorët, që shantazhon mediat nëpërmjet abuzimit me asetet shtetërore!
Damka e turpit i mbetet qeverisë dhe Ramës por dëmi bie mbi turizmin dhe investitorët! Pas 20 vitesh politikë Rama kthehet me moton të shkatërrohen resortet të mbijnë kioskat!
Alfred Peza ironizon Ramën
Drejtori i mediave “Panorama”, Alfred Peza, thotë se ajo që po ndodh në “Prestige Resort”, janë një imazh i keq për Shqipërinë.
“Këto pamjet po bëjnë xhiron rrjetit dhe të botës, dhe është reklama më e keqe që mund ti bëhet Shqipërisë. Shqipëria ka pasur nevojë për shumë gjëra. Ne kemi vuajtur nga imazhi i keq. Por të prodhosh imazhe të tilla me bekimin e mazhorancës dhe me një trup policish dhe inspektorë të IKMT, dhe këto t’ja shpërndash botës në sezonin turistik, kjo është një çmenduri. Është një arritje e madhe në fakt, sepse Rama erdhi në politikë duke shembur kioskat dhe tani ia ka dalë që të shembë resorte me 5 yje.
Është arritje e madhe që të fillosh nga kioskat dhe të arrish deri tek resortet me 5 yje dhe të shembësh pishina. Luks i shfrenuar për një vend si Shqipëria. Duhet të jesh këtu ta kuptosh, dhe ta kuptosh këtë metamorfozë jo pozitive”, tha nder të tjera Peza.
Genc Pollo: Sulmi është për të disiplinuar median
Aksioni i IKMT-së në ambientet e “Prestige Resort” në Golem, nisi në orët e para të mëngjesit të sotëm. Pa asnjë paralajmërim është ndërhyrë për të prishur dy pishinat e resortit.
Ish-ministri dhe ish-deputeti Genc Pollo ka reaguar për sulmin që IKMT bëri në “Prestige Resort”, duke shembur dy pishina.
“Sulmi ndaj Prestige Resort është për të disiplinuar median; për të bërë shembull!
Do të dështojë!!!”, shkruan ai në Facebook.
