Kryetari i Partisë Demokratike, Lulzim Basha, mohoi në mënyrë kategorike të ketë pasur një takim me Ramën gjatë pandemisë. Kryedemokrati tha në emisionin “Opinion” se nuk ka patur asnjë tentativë. Më tej ai shtoi se opozita nuk e ka shfrytëzuar aspak situatën për panik, por propozuan një plan kur panë qeverinë e papërgatitur.
“Jo nuk kam patur asnjë tentativë. Pse duhet të kisha tentativë? Ju e keni parë vetë çfarë sjellje ka adoptuar. Kur ne propozonim masa, ky dilte e shante në parlament.
Pastaj kur e pa se çfarë po ndodhte, në vend që të bënte një gjest prej shtetari, doli e përhapi panik dhe duke zgurdulluar sytë thoshte do shkojmë për mish qeni, mish mace, arkivole, etj.
Është një regjim dhe regjimi nuk pret telefonata nga opozita. Opozita nuk e shfrytëzoi situatën për panik, pa një qeveri të papërgatitur dhe i propozoi një plan. Jo se na intereson qeveria, sepse dështimi i qeverisë në ato momente do të kushtonte jetë dhe mirëqenie”, tha Basha.
