Kryeministri Edi Rama, gjatë një takimi me dhomat e biznesit u shpreh se kërkon që të ndërtohet një format dialogu sistematik mes biznesit dhe institucioneve. I shoqëruar nga ministrja e Financave dhe Ekonomisë, Delina Ibrahimaj, kreu i qeverisë deklaroi se legjislacioni që lidhet me klimën e biznesit është i prapambetur, dhe do të përmirësohet, duke u përafruar me legjislacionin e vendeve të zhvilluara.
Kryeministri Edi Rama apeloi ndaj bizneseve që të nisin prodhimin e energjisë diellore, për të rikuperuar humbjet dhe shpenzimet e larta pas rritjes së energjisë elektrike.
“Dëshiroj të theksoj nevojën që të nxisim kalimin e konsumit energjetik dhe biznesi mund ta paraprijë. Me burim energjinë diellore.
Është koha për t’i rënë lapsit, të gjithë që investimet për të prodhuar energji në fabrikë të pranohen nga shteti si investime që duhet të përkthehen në shkëmbim energjie në rrjet. Nuk e ka shpikur akoma bota formulën për të futur në rrjet energjinë diellore.
Çdo investim që bëhet në një vend si Shqipëria, për të prodhuar konsumin e energjisë vetë nga dielli është fitimprurës dhe ul ndjeshëm kostot e energjisë për biznesin. Ne i mirëpresim të gjitha idetë nga ju për se si mund të lehtësojmë investimin, duke e harruar plotësisht shkëmbimin e energjisë”, tha Rama.
